PakFellows Blog » Amjad Islam Amjad

Khilonay By Amjad Islam Amjad

Faiza — Mon, 30 Jan 2012 02:00:20 +0000

کھلونوں کی دکانوں میں کھلونے ہی کھلونے ہیں
ہزاروں رنگ ہیں انکے ، ہزاروں روپ ہیں انکے
کبھی ہنستے، کبھی روتے، کبھی نغمے سناتے ہیں
چمکتی موٹروں میں آنے والے خوش لباس و خوش نما بچے
جدھر دیکھیں جہاں پر ہاتھ رکھ دیں ، ان کھلونوں کے
وہی مالک، وہی قابض، وہی آقا ٹھرتے ہیں
وہ چاہیں تو کسی لمحے
جسے چاہیں اٹھائیں اور چکنا چور کر ڈالیں
کھلونوں کی دکانوں میں وہ گڈّے اور گڑیاں اب نہیں ملتے
کے جو پھٹتے لحافوں سے رویئ کے گچھوں
پرانی دھججیوں سے مل کے بنتے تھے
محلے بھر کے بچے جن کی شادی میں باراتی بن کے آتے تھے
تو ایسی ہی مسرت سے بھری دنیا کی بانہوں میں
جواں ہوتے تھے وہ لاکھوں، کروڑوں خوش نظر بچے
کے جو اپنے انہی خود ساختہ ، بھدے نہایت ان گھڑے
سستے کھلونوں کو متاعِ جاں سمجھتے تھے
انہیں اپنے شکستہ گھر کے طاقوں ، کھڑکیوں، الماریوں
میں یوں سجاتے تھے
کے جیسے ان سے بہتر چیز دنیا میں کہاں ہوگی
یہی بچے جو اب حسرت بھری دزدیدہ نظروں سے
کھلونوں کی دکانوں میں کبھی جو جھانکنا چاہیں
تو انکو ایسا کرنے کی اجازت ہی نہیں ملتی
کے شیلفوں میں سجا اک بھی کھلونا انکے وارے میں نہیں ہوتا
یہ دنیا ایسی منڈی ہے
بلا قیمت جہاں انسان بیچے جا تو سکتے ہیں
کھلونوں کا مگر سودا خسارے میں نہیں ہوتا
زمانے بھر کے بچوں کا یہ مشترکہ وتیرہ ہے
کھلونے جب ملیں انکو تو وہ خوش ہو کے ہنستے ہیں
مگر جب ان کھلونوں سے بھری اونچی دکانوں سے
پلٹتے پھول سے بچے ، تہی دامان آتے ہیں
نم آنکھوں میں ، بھرے آنسو، بہ صد مشکل چھپاتے ہیں
تو لگتا ہے
کہ بچے اب نہیں ہنستے
کھلونے ان پہ ہنستے ہیں

Dard Phail Jaye Tou

Faiza — Sat, 16 Apr 2011 13:27:46 +0000

درد پھیل جائے تو
ایک وقت آتا ہے
دل دھڑکتا رہتا ہے
آرزوگزیدوں کے حوصلے نہیں چلتے
دشتِ بے یقینی میں آسرے نہیں چلتے
رہرؤں کی آنکھوں میں
منزلیں نہ جب تک ہوں ، قافلے نہیں چلتے
اک ذرا توجہ سے دیکھئے تو کُھلتا ہے
لوگ اِن پہ چلتے ہیں ، راستے نہیں چلتے
سوچنے ، سمجھنے سے ، ساتھ ساتھ چلنے سے
دوریاں سمٹتی ہیں ، فاصلے نہیں چلتے
خواب خواب آنکھوں میں رتجگے نہیں چلتے
درگُزر کے حلقے میں مسئلے نہیں چلتے
دو دِلوں کی قربت میں تیسرا نہیں ہوتا
”واسطے“ نہیں چلتے
بخت ساتھ چلتا ہے ، طابع آزمائوں کے
وقت رام کرنے میں ، تجزیوں کے داؤ کیا
”تجربے“ نہیں چلتے
عشق کے علاقے میں ، حُکمِ یار چلتا ہے
ضابطے نہیں چلتے
حُسن کی عدالت میں ، عاجزی تو چلتی ہے
مرتبے نہیں چلتے
دوستی کے رشتوں کی پرورش ضروری ہے
سلسلے تعلق کے خود سے بن تو جاتے ہیں
لیکن اِن شگوفوں کو ٹوٹنے بکھرنے سے
روکنا بھی پڑتا ہے
چاہتوں کی مٹی کو ، آرزو کے پودوں کو
سینچنا بھی پڑتا ہے
رنجشوں کی باتوں کو ، بھولنا بھی پڑتا ہے

امجد اسلام امجد

Download Mausam Acha hai by Amjad Islam Amjad

Samah — Sat, 05 Mar 2011 07:36:15 +0000

کتاب، موسم اچھا ہے
شاعر، امجد اسلام امجد

امجد اسلام امجد نے آبائي شہر سيالکوٹ لاہور ميں تعليم حاصل کي اور ايم اے او کالج لاہور سے ايک ليکچرار کي حيثيت سے عملي زندگي کا آغاز کيا، 1975 سے 1979 تک پاکستان ٹيلي ويثرن پر ڈائريکٹر کي حيثيت سے کام کرتے رہے، اس کے بعد دوبارہ اسي کالج ميں آگئے۔ 1997 ميں ڈائريکڑ جنرل اردو سائنس بورڈ مقرر ہوئے، چلڈرن لائبريري کمپليکس کے پروجيکٹ ڈائريکٹر رہے، چاليس کتابوں کے مصنف ہيں۔ بيشمار سفرنامہ، تنقيد، تراجم اور مضامين لکھے، نيشنيل ايوارڈ يافتہ ہيں، گو ان کي شہرت انکے ڈراموں کي بدولت ہے، ليکن ان کي حقيقي پہچان انکي وہ نظميں ہيں جن ميں زندگي کے تمام تر پہلو اپني تمام تر دلکشي اور مٹھاس لئے ہوئے ہيں۔

ماں کی یاد میں

Faiza — Sun, 02 Jan 2011 09:25:14 +0000

یہ نظم امجد اسلام امجد نے اپنی والدہ کے انتقال پر لکھی جو انکی ماں کے انتقال سے لے کر ١٠ دنوں میں مکمل ہوئی

میں جدھر گیا میں جہاں رہا
میرے ساتھ تھا
وہی ایک سایہ مہرباں
وہ جو ایک پارہ ابر تھا سر آسماں
پس ہر گماں
وہ جو ایک حرف یقین تھا
میرے ہر سفر کا امین تھا
وہ جو ایک باغ ارم نما ، سبھی موسموں میں ہرا رہا
وہ اجڑ گیا
وہ جو اک دُعا کا چراغ سا ، میرے راستوں میں جلا رہا
وہ بکھر گیا
میرے غم کو جڑ سے اُکھاڑھتا
وہ جو ایک لمسِ عزیز تھا
کسی کپکپاتے سے ہاتھ کا ، وہ نہیں رہا
وہ جو آنکھ رہتی تھی جاگتی ، میرے نام پر
وہ سو گئی
وہ جو اک دعاِ سکون تھی میرے رخت میں ، وہی کھو گئی
اے خدُائےِ واحد و لم یزل
تیرے ایک حرف کے صید ہیں
یہ زماں مکاں
تیرے فیصلوں کے حضور میں
نہ مجال ہے کسی عذر کی نہ کسی کو تابِ سوال ہے
یہ جو زندگی کی متاء ہے
تیری دین ہے تیرا مال ہے
مجھے ہے تو اتنا ملال ہے
کہ جب اُسکی ساعت آخری سرِ راہ تھی
میں وہاں نہ تھا
میرے راستوں سے نکل گئی وہ جو ایک جاہِ پناہ تھی
میں وہاں نہ تھا
سرِ شام غم مجھے ڈھونڈتی میری ماں کی بجھتی نگاہ تھی
میں وہاں نہ تھا
میرے چار سو ہے دُھواں دُھواں
میرے خواب سے میری آنکھ تک
یہ جو سیلِ اشک ہے درمیاں
اُسی سیلِ اشک کے پار ہے
کہیں میری ماں
تیرے رحم کی نہیں حد کوئی
تیرے عفو کی نہیں انتہا
کے تو ماں سے بڑھ کے شفیق ہے
وہ رفیق ہے
کے جو ساتھ ہو تو یہ زندگی کی مسافتیں
یہ ازیتیں یہ رکاوٹیں
فقط اک نگاہ کی مار ہیں
یہ جو خار ہیں
تیرے دست معجزہ ساز ہیں
گل خوش جمال بہار ہیں
میری التجا ہے تو بس یہی
میری زندگی کا جو وقت ہے
کٹے اُس کی اُجلی دعاؤں میں
تیری بخشِشوں کے دِیار میں
میری ماں کی روحِ جمیل کو
سدا رکھنا اپنے جوار میں
سد ا پُر ِفضا وہ لحد رہے تیری لطفِ خاص کی چھاؤں میں

ہر پَل دھیان میں بسنے والے لوگ

Faiza — Thu, 11 Nov 2010 09:13:18 +0000

ہر پَل دھیان میں بسنے والے لوگ افسانے ہو جاتے ہیں
آنکھیں بوڑھی ہو جاتی ہیں خواب پرانے ہو جاتے ہیں

ساری بات تعلق والی جذبوں کی سچّائی تک ہے
مَیل دلوں میں آجائے تو گھر ویرانے ہو جاتے ہیں

منظر منطر کِھل اُٹھتی ہے پیراہن کی قوسِ قزح
موسم تیرے ہنس پڑنے سے اور سہانے ہو جاتے ہیں

جھونپڑیوں میں ہر اِک تلخی پیدا ہوتے مِل جاتی ہے
اِسی لیے تو وقت سے پہلے طفل سیانے ہوجاتے ہیں

موسمِ عشق کی آہٹ سے ہی ہر اِک چیز بدل جاتی ہے
راتیں پاگل کردیتی ہیں دِن دیوانے ہو جاتے ہیں

دُنیا کے اِس شور نے امجد کیا کیا ہم سے چھین لیا ہے
خود سے بات کیے بھی اب تو کئی زمانے ہو جاتے ہیں

Download Pas-e-Guftugu by Amjad Islam Amjad

Samah — Sun, 24 Oct 2010 08:57:46 +0000

یہ کتاب امجد اسلام امجد کی چند بہترین کاوشوں کا مجموعہ ہے۔ امجد اسلام امجد نے آبائي شہر سيالکوٹ لاہور ميں تعليم حاصل کي اور ايم اے او کالج لاہور سے ايک ليکچرار کي حيثيت سے عملي زندگي کا آغاز کيا، 1975 سے 1979 تک پاکستان ٹيلي ويثرن پر ڈائريکٹر کي حيثيت سے کام کرتے رہے، اس کے بعد دوبارہ اسي کالج ميں آگئے۔ 1997 ميں ڈائريکڑ جنرل اردو سائنس بورڈ مقرر ہوئے، چلڈرن لائبريري کمپليکس کے پروجيکٹ ڈائريکٹر رہے، چاليس کتابوں کے مصنف ہيں۔ بيشمار سفرنامہ، تنقيد، تراجم اور مضامين لکھے، نيشنيل ايوارڈ يافتہ ہيں، گو ان کي شہرت انکے ڈراموں کي بدولت ہے، ليکن ان کي حقيقي پہچان انکي وہ نظميں ہيں جن ميں زندگي کے تمام تر پہلو اپني تمام تر دلکشي اور مٹھاس لئے ہوئے ہيں۔

کہیں سے سورج نکل پڑے گا

Samah — Wed, 06 Oct 2010 13:38:46 +0000

یہ رات اپنے سیاہ پنجوں کو جس قدر بھی دراز کرے
میں تیرگی کا غبار بن کر نہیں جیوں گا
مجھے پتا ہے کے ایک جگنو کے جاگنے سے
یہ تیرگی کی دبیز چادر نہیں کٹے گی
مجھے خبر ہے کے میری بےزور ٹکروں سے
فصیل دہشت نہیں ہٹے گی
میں جانتا ہوں کہ میرا شعلہ چمک کے رزق غبار ہوگا
تو بےخبر یہ دیار ہوگا
میں روشنی کی لکیر بن کر کسی ستارے کی مثال بکھروں گا
بستیوں کو خبر نہ ہوگی
میں جانتا ہوں کے میری کمتاب روشنی سے سحر نہ ہوگی
مگر میں پھر بھی سیاہ شب کا غبار بن کر نہیں جیوں گا
کرن ہو کتنی نحیف لیکن کرن ہے پھر بھی
وہ ترجمان ہے روشنی کا
وجود زندہ اور جب تک
یہ روشنی کا وجود زندہ ہے رات اپنے
سیاہ پنجوں کو جس قدر بھی دراز کرے
کہیں سے سورج نکل پڑے گا

امجد اسلام امجد

اے ارضِ وطن

Faiza — Fri, 13 Aug 2010 18:37:43 +0000

اک نظم لکھیں
اے ارضِ وطن، ہم تیرے لئے اک نطم لکھیں
تتلی کے پروں سے رنگ چنیں
اُن سازوں سے آہنگ چنیں
جو روح میں بجتے رہتے ہیں
اور خواب بُنیں اُن پھولوں کے
جو تیری مہک سے وابستہ
ھر آنکھ میں سجتے رہتے ہیں
ہر عکس ہو جس میں لا ثانی
ہم ایسا اک ارژنگ چنیں
تتلی کے پروں سے رنگ چنیں
اور نطم لکھیں

وہ نظم کہ جس کے حرفوں جیسے حرف کسی ابجد میں نہیں
وہ رنگ اُتاریں لفظوں میں جو قوسِ قزح کی زد میں نہیں
اور جس کی ہر اک سطر میں خوشبو ایسے لہریں لیتی ہو
جو وہم گماں کی حد میں نہیں
اور جب یہ سب انہونی باتیں، اَن دیکھی، اَن چھوئی چیزیں
اِک دوجے میں مل جائے تو نطم بنے
اے ارضِ وطن وہ نظم بنے جو اپنی بُنت میں کامل ہو
جو تیری رُوپ کے شایاں ہو اور میرے ہنر کا حاصل ہو

اے ارضِ اماں، اے ارضِ وطن
تُو شاد رہے آباد رہے
میں تیرا تھا، میں تیرا ہوں
بس اتنا تجھ کو یاد رہے
اِس کشتِ ہنر میں جو کچھ ہے
کب میرا ہے
سب تجھ سے ہے، سب تیرا ہے

یہ حرف و سخن، یہ لوح و قلم
سب اُڑتی دُھول مُسافت کی
سب جوگی والا پھیرا ہے
سب تجھ سے ہے، سب تیرا ہے
سب تیرا ہے

امجد اسلام امجد

Dasht-e-Talab by Amjad Islam Amjad

Samah — Tue, 15 Jun 2010 15:04:59 +0000

اب کے سفر ہی اور تھا‘ اور ہی کچھ سراب تھے
دشتِ طلب میں جا بجا‘ سنگِ گرانِ خواب تھے
حشر کے دن کا غلغلہ‘ شہر کے بام و دَر میں تھا
نگلے ہوئے سوال تھے‘ اُگلے ہوئے جواب تھے
اب کے برس بہار کی‘ رُت بھی تھی اِنتظار کی
لہجوں میں سیلِ درد تھا‘ آنکھوں میں اضطراب تھے
خوابوں کے چاند ڈھل گئے تاروں کے دم نکل گئے
پھولوں کے ہاتھ جل گئے‘ کیسے یہ آفتاب تھے
سیل کی رہگزر ہوئے‘ ہونٹ نہ پھر بھی تر ہوئے
کیسی عجیب پیاس تھی‘ کیسے عجب سحاب تھے
عمر اسی تضاد میں‘ رزقِ غبار ہو گئی
جسم تھا اور عذاب تھے‘ آنکھیں تھیں اور خواب تھے
صبح ہوئی تو شہر کے‘ شور میں یوں بِکھر گئے
جیسے وہ آدمی نہ تھے‘ نقش و نگارِ آب تھے
آنکھوں میں خون بھر گئے‘ رستوں میں ہی بِکھر گئے
آنے سے قبل مر گئے‘ ایسے بھی انقلاب تھے
ربط کی بات اور ہے‘ ضبط کی بات اور ہے
یہ جو فشارِ خاک ہے‘ اِس میں کبھی گلاب تھے
اَبر برس کے کھُل گئے‘ جی کے غبار دُھل گئے
آنکھ میں رُونما ہوئے‘ شہر جو زیرِ آب تھے
درد کی رہگزار میں‘ چلتے تو کِس خمار میں
چشم کہ بے نگاہ تھی‘ ہونٹ کہ بے خطاب تھے

امجد اسلام امجد

کبھی ان کی پیاس تو دیکھتے

Faiza — Mon, 17 May 2010 09:34:41 +0000

میرے خوش نظر میرے خوش ادا
وہ جو عمر بھر رہے منتظر کسی التفات کی آس میں
کبھی خواہشوں کے فریب میں ، کبھی واہموں کے لباس میں
کسی دل شکن سے گریز میں ، کسی جانگسل سے ہراس میں
وہ جو اس طرح ہوے بےنشاں کے جوں اوس جذب ہو گھاس میں
وہی لوگ تھے یہاں روز و شب
ہوں چراغ جیسے کے جاں بہ لب
وہ تھکے ہوے تو ضرور تھے
پہ تھے سب یہیں ، نہیں دور تھے
مگر اپنے قرب و جوار میں کبھی ڈالتے تو نگاہ تم
مگر اپنے تخت جمال کے کبھی آس پاس تو دیکھتے
کسی ابر سے جہاں گھر کے تم
یونہی بے گمان سے گزر گئے
تمھیں اپنی دھن میں خبر نہ تھی
کے کہاں کہاں سے گزر گئے
یہی بستیاں تھیں وہ بستیاں ، جہاں رات دن
کہیں بارشوں کی امید تھی
کہیں انتظار بہار تھا
کہیں منزلیں تھیں دھواں دھواں
کہیں راستوں کا غبار تھا
میرے چارہ گر ، میرے مہر باں
وہ جو ہو گئے یہاں بے نشاں
کبھی ان کا حال تو پوچھتے ، کبھی ان کی پیاس تو دیکھتے !

امجد اسلام امجد

PakFellows Blog » Amjad Islam Amjad

Khilonay By Amjad Islam Amjad

Similar Articles at PakFellows Blog:

Dard Phail Jaye Tou

Similar Articles at PakFellows Blog:

Download Mausam Acha hai by Amjad Islam Amjad

Similar Articles at PakFellows Blog:

ماں کی یاد میں

Similar Articles at PakFellows Blog:

ہر پَل دھیان میں بسنے والے لوگ

Similar Articles at PakFellows Blog:

Download Pas-e-Guftugu by Amjad Islam Amjad

Similar Articles at PakFellows Blog:

کہیں سے سورج نکل پڑے گا

اے ارضِ وطن

Dasht-e-Talab by Amjad Islam Amjad

کبھی ان کی پیاس تو دیکھتے